🔴 صحيفة وول ستريت جورنال الأمريكية من 20 ساعة بالظبط فجرت قنبلة بجد من اللي يتققال عليها من العيار التقيل بدون مبالغة وبتكشف السر اللي عواصم خليجية بتحاول تنفيه بكل الطرق وبتقول ان أمريكا بتستخدم أراضي دول عربية خليجية كمنصات إطلاق صواريخ باليستية برية لضرب العمق الإيراني وتدمير أهدافه الحيوية.
🔴 الصحيفة الأمريكية كشفت إن الجيش الأمريكي بدأ لأول مرة في تاريخه القتالي يستخدم صواريخ برية دقيقة جداً ومداها قصير (بيتراوح بين 200 لـ 300 ميل) زي منظومات أتاكمز (ATACMS) وهايمارس (HIMARS) وصواريخ الضربة الدقيقة (PrSM). لغة الأرقام والمسافات هنا بتفضح المستور.. المدى القصير للصواريخ دي بيأكد جغرافياً استحالة إطلاقها من قواعد بعيدة، وإنها انطلقت من أراضي دول الجوار الخليجي مباشرة لضرب أهداف إيرانية، منها إغراق سفن وغواصة عسكرية وهي راسية في الميناء.
🔴 الأدلة مش استنتاجات أو تحليلات موقع الصحيفة نشر مقاطع فيديو، تحققت منها وكالة ستوريفول التابعة للجريدة، بتوثق لحظات انطلاق صواريخ هايمارس الأمريكية من داخل أراضي البحرين، اللي بتبعد عن السواحل الإيرانية حوالي 125 ميل بس عبر مياه الخليج.
🔴 التصعيد ده هو اللي بيفسر الانفجار الإيراني الأخير في وجه دول الخليج وتوجيه الضربات ليها. وزير الخارجية الإيراني عباس عراقجي ظهر في مقابلة مع شبكة MS NOW وسمى الأشياء بمسمياتها، وأكد إن القوات الأمريكية ضربت جزيرة خارق (أهم قلب نابض لتصدير النفط الإيراني) باستخدام صواريخ هايمارس انطلقت من نقطتين داخل الإمارات واحدة قريبة من رأس الخيمة، والتانية قريبة جداً من دبي.
🔴 التقرير الأمريكي ده بيربط كل خيوط المشهد المعقد اللي حللناه الأيام اللي فاتت.. تسريب المعلومات دي بيفسر لنا بوضوح ليه إيران بدأت توجه ضرباتها الانتقامية لمنشآت ودول في الخليج (زي ما حذر حمد بن جاسم)، وليه البرلمان الإيراني بيتحرك لفرض إتاوات المرور الآمن على السفن في مضيق هرمز.
طهران بتعاقب العواصم دي على فتح أراضيها كمنصات إطلاق أمريكية، وبتبعت رسالة نار إن ادعاء الحياد سقط، وإن أي دولة بتشارك في الهجوم بقت هدف مشروع ومباشر في بنك الأهداف الإيراني.
🔴 من الاخر يا حبايب رقعة الحرب بتتوسع بشكل مذهل المواجهة اللي كانت أمريكا بتديرها من الجو، اتحولت لحرب صواريخ برية بتورط دول الخليج بشكل مباشر في خط النار، وبتخلي المنطقة كلها على حافة حرب إقليمية شاملة محدش هيقدر يسيطر على شرارتها.
