تيتي تيتي….
صورة دارة صادر مطر بساحة تنورين الفوقا….
من وقتها لليوم، تضاعف عدد سكان العالم حوالي خمس مرّات، و تضاعف عدد سكان لبنان تقريباً بنفس النسبة….
و لكن تراجع عدد سكان تنورين حوالي 90%….
لا صار حرب بهالساحة مع الجيش السوري و لا الاسرائيلي و لا حتى المنظمات الفلسطينية و لا حتى تقاتل اهلي….و لكن، هالدار صارت خربة و بيوت كتيرة صاروا متلها بساحة الضيعة و ابعد من الساحة….
في كم شغلة ما تغيّرت من 121 سنة لليوم….نفس السياسات مستمرّة…مع نفس النتائج….
ممكن الواحد يكذّب كذبات و يصدّقها، متل:
1- كذبة أن الفيديرالية هي الحل….و لكن، بين سنة 1898 (تاريخ الصورة) و 1917، كانت تنورين بالمتصرفية و قبلها كانت بالقائم مقامية، يعني جرّبنا الفيديرالية و حبّة مسك.
2- كذبة إنو مرحلة منتصف القرن العشرين كانت مرحلة بحبوحة….
لكن هيّاه خراب البيوت و هيّاه تراجع عدد السكان….
كمّلوا بنفس السياسة، و لكن كتّروا الصوَر كرمال يبقى شي من ذكرى هالضيعة الحلوة….
متل ضِيَع تانية اختفت مع ارطال اشعار عن الوجود و الأرزة و التاريخ و أهم شي “قداسة الإقتصاد الحرّ…السلام على اسمه”
ريمون نهرا
